Luis Peña Gantxegi

Luis Peña Gantxegi
Irudi gehiago
Bizitza
Jaiotza	Oñati, 1926ko martxoaren 29a
Herrialdea	Gipuzkoa, Euskal Herria
Heriotza	Donostia, 2009ko apirilaren 2a (83 urte)
Hezkuntza
Hizkuntzak	gaztelania euskara
Jarduerak
Jarduerak	arkitektoa
Lantokia(k)	Donostia

Luis Peña Gantxegi^[1] (Oñati, Gipuzkoa, 1926ko martxoaren 29a - Donostia, 2009ko apirilaren 2a) arkitektoa izan zen. Oso ezaguna egin zen, batez ere, Donostiako Haizearen orrazia eta Gasteizko Foru plaza egin zituelako, Eduardo Txillida eskultorearekin batera, bai eta Gasteizko San Frantzisko Asisko eliza ere.

1959. urtean Madrilgo Arkitektura Eskolan diplomatu zen eta urte horretan bertan hasi zen Zarauzko Vista Alegre etxebizitza-dorrea egiten, Juan Manuel Encio arkitektoarekin batera, parkean barreiatutako dorre-multzo baten lehena izan behar zuena. 1976 eta 1982 urte bitartean irakasle izan zen Bartzelonako Arkitektura Eskolan. Oriol Bohigas arkitekto katalanarekin batera Donostiako Arkitektura Eskolaren sortzailea izan zen, hasieran Bartzelonako Eskolaren menpekoa eta, gero, Euskal Herriko Unibertsitatearen baitan.

Bere lanak inguru natural eta kulturalean moldatuta edo egokituta egon zitezen saiatzen zen, baita euskal tradizioari fidelak izaten ere. Donostiako Tenis plazaren egilea izan zen (1976), itsasoa eta Eduardo Txillida eskultorearen Haizearen orrazia eskulturak ikusteko leku paregabea, hainbat plataforma, egonleku eta mailadiz osatua.

1988an Peña Ganchegui y asociados bulegoa sortu zuen Donostian, Rocío Peña eta Mario Sangalli arkitektoekin batera.

1997. urtean Arkitekturako Munibe Saria jaso zuen.

Bizitza osoan egindako lanagatik, Espainiako Arkitektoen Eskolako Urrezko Domina jaso zuen 2004an.

2005ean, Mutrikuko Berdela izeneko saria jaso zuen, Mutrikun eraikitako 40 bat eraikinengatik.^[2]

2009an zendu zen, 83 urte zituela.^[3]

Lan nagusiak

• 1959-1960: Vista Alegre etxebizitza dorrea, Zarautz (Juan Manuel Encio arkitektoarekin batera)
• 1963: Trinitate plaza (pilotalekua, bolatokia, mailadia eta idi dema lekua) Donostia^[4]
• 1963-1967: Iparragirre etxebizitzak, Mutriku
• 1964-1965: Aizetzu etxebizitzak, Mutriku
• 1965-1966: Imanolena etxea, Mutriku
• 1968: San Frantzisko Asisko eliza, Gasteiz (han jazo zen Gasteizko martxoaren 3ko sarraskia)
• 1969: Larreina etxebizitzak, Mutriku
• 1973-1975: Gipuzkoako Batasun Farmazeutikoaren biltegia, Donostia
• 1975-1977: Tenis plaza (Haizearen orrazia), Donostia. Eduardo Txillida eskultorearekin elkarlanean.
• 1977: Hilerriko Monumentua, Oiartzun
• 1977-1978: Xabier Zubiri institutua, Donostia
• 1978: Foru plaza, Gasteiz (Eduardo Txillida eskultorearekin elkarlanean)
• 1981-1986: Mirakontxako etxebizitzak, Donostia

• 1984-1985: Espanya Industrial parkea, Bartzelona
• 1991: Abarka etxebizitzak, Oñati
• 1991-1992: Amara Plaza hotela, Donostia
• 1994: Onddi dorrea, Hernani
• 1994: Kiroldegia eta igerilekuak, Villabona
• 1995-1996: Aranburu Jauregia kultura etxea, Tolosa
• 1997: Zementuaren Museoa, Añorga, Donostia
• 1998: Bastero Kulturgunea, Andoain
• 1999: Santiago plaza, Pasai Donibane
• 2002: Bilboko itsasadarra Itsas Museoa
• 2004: Leizaola lehendakariaren kalearen 21. eta 27. zenbakiko etxebizitzak, Abandoibarra, Bilbo
• 2005: Leidor zinema-aretoaren zaharberritzea, Tolosa

Erreferentziak

Kanpo estekak

• Luis Peña Gantxegi arkitektura agentziaren web gunea (proiektu guztien argazki eta planoak, eraikiak eta eraikigabeak)
• Luis Peñari egindako elkarrizketa www.zientzia.net webgunean^{[Betiko hautsitako esteka]}

• Datuak: Q1771508
• Multimedia: Luis Peña Gantxegi / Q1771508