Goldaketan

Goldaketan
Jatorria
Egilea(k)	Jokin Zaitegi
Argitaratze-data	1946
Jatorrizko herrialdea	Mexiko
Ezaugarriak
Genero artistikoa	olerkigintza
Hizkuntza	euskara

Goldaketan. Atzerri, Euskelerri Jokin Zaitegi plazaratu zuen lehenengo poesia-liburua izan zen. Mexikon Telesforo Monzonek eta beste erbesteratuek bultzatu zuten Pizkunde argitaletxean, 1946an^[1] argitaratu zuen. Ordurako Arrasateko idazlea, Jesusen Lagundia utzita, Guatemalan bizi zen. Azalean Aurelio Arteta margolariaren margo bat jaso zuen.

Edukia

Liburuan ehun olerki inguru bildu zuen Zaitegik. Liburua "Opariz" izenburuko eskaintza batekin ireki zuen. Bertan bere biografiaren datu batzuk eman zituen: "Olerki-txorta au Euzkadi'n bizi zeran euskeldun zorioneko orri eskeintzen dizu atzerrian bizi dan euskaldun batek"^[2] Bildumaren lehen poema "Tori nire edontzia", 1934an Zarauzko Euskal Poesiaren V. Eguneko Zilarrezko aritz-adar saria irabazi zuen lana da. Bildutako gainontzeko poemak oso toki eta leku desberdinetan idatziak dira: Marneffen (Belgikan), Panaman, Venezuelako Méridan...

Liburuan bi bloke ikus daitezke:

Zaitegiren lan propioak, (11-153 or.). Poemak luzera desberdinekoak dira. Azpimagarria da "Eusko-artzaiarena", luzera handiko poema.
Beste olerkari ospetsuen itzulpenak eta bertsioak (154-215 or.). Hemen idazlearen gustuko olerkariak aurkituko ditugu: Henry Wadsworth Longfellow, Jacint Verdaguer, Alfred de Musset, Charles Baudelaire... eta batez ere Horazio.

Estiloa

Poema hauek ez dira irakurtzeko errazak. Zaitegiren asmoa euskara goi mailako hizkuntzen kategoriara eramatea zen eta, ondorioz, erdarazko hitzak saihestu zituen, latinismoak sartuz. Kultura erreferentziak ere ugariak dira.

Erreferentziak

↑ Datu honetaz zalantzak daude zeren eta liburuan bi data desberdinak agertzen baitira: inprimategiarena, 1946, eta, hitzaurrearena, 1947ko otsailak 7.
↑ 9.or.