Espora
Biologian espora (antzinako grezieraz: σπορά, spora, "hazia") oso ugalgorputz txikia da, zelulabakarra gehienetan (zelulanitza onddo batzuetan), garatzen denean zuzenki beste banako bat eratzeko ahalmena duena[1]. Onddo, landare, alga eta protozoo batzuetan eratzen dira.
Horrezaz gain, zelula begetatibo batek, bere paretak lodituz, egoera ez-egokietan eratzen duen gorputz iraunkorrari ere espora deitzen zaio. Endosporak, muturreko baldintzen aurrean (tenperatura, ur eta elikagairik eza, erradazioak...), hainbat bakteriok sortzen dituzten zelula erresistenteak dira[1].
Espora motak
- Espora haploidea: zelula ama baten meiosiaz eratzen den espora, bere nukleoan kromosomak bikoiztu gabe dauzka eta zuzenki gametofito haploidea eratzeko ahalmena du.
- Espora meiotikoa: zelula ama baten meiosiaz eratzen den espora haploidea.
- Diktiospora edo horma-formako espora:zeharkako eta luzetarako trenkadak dituen espora trenkatua.
- Espora apaindua: azalean apaingarriak dituen espora.
- Hipnospora edo espora iraunkorra: zelula begetatibo batek, egoera ez-egoki baten aurrean, bere paretak lodituz, eratzen duen egitura iraunkorra.
- Teleutospora edo negu-espora: onddo uredinaleetan, udazkenean eratzen den kolore iluneko espora. Benetako klamidospora da eta negua igaro ondoren, ostalariaren hostoetan erne beharrean, lurrean ernetzen da.
- Uredospora edo uda-espora: herdoil-onddoetan (Uredinaleetan), udan eratzen den espora-mota. Esporen multzoa herdoil-kolorekoa da.
Erreferentziak
- Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2013/02/28 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.
- ↑ a b Euskalterm Euskara.euskadi.net
Kanpo estekak
| Autoritate kontrola |
|
|---|
Datuak: Q177332
Multimedia: Spores / Q177332
